Londonning «Arsenal» klubi darvozaboni David Rayyaning faoliyati butunlay boshqacha tus olishi mumkin edi. 2023 yilning avgust oyida «to‘pchilar» ispaniyalik posbonni «Brentford»dan bir yildan so‘ng kuchga kiradigan sotib olish majburiyati bilan ijaraga olishgan edi.
«Men «Arsenal»ga kelishimdan oldin boshqa klubga o‘tishga juda yaqin edim. Baxtimizga, bu amalga oshmadi va shundan so‘ng «Arsenal» men bilan bog‘landi. O‘sha klub «Bavariya» edi», — dedi Rayya o‘z intervyusida. Uning so‘zlarini jurnalist Fabrisio Romano keltirmoqda.
30 yoshli darvozabon joriy mavsumda Mikel Arteta jamoasi safida 40 ta o‘yinda maydonga tushib, 25 ta gol o‘tkazib yubordi. Futbolchining London grandi bilan shartnomasi 2028 yilgacha mo‘ljallangan.
