Angliyaning «Manchester Yunayted» klubi mahalliy hakamlik tashkiloti (PGMOL) va uning rahbari Xovard Uebb ustidan rasmiy shikoyat topshirish niyatida. Bunga chempionatning 31-turi doirasidagi «Bornmut»ga qarshi kechgan va 2:2 hisobidagi durang bilan yakunlangan o‘yindagi bahsli hakamlik qarorlari sabab bo‘lgan.
Klub rahbariyati uchrashuvning ikkinchi bo‘limida Amad Diallo jarima maydonchasi ichida yiqitilganiga qaramay, «Bornmut» darvozasiga penalti belgilanmaganidan g‘azabda. VAR tizimi ushbu vaziyatga aralashmadi va ko‘p o‘tmay «Bornmut» hisobni tenglashtirishga muvaffaq bo‘ldi.
Shunga o‘xshash vaziyatda Xarri Maguayrning maydondan chetlatilishi va raqib foydasiga penalti belgilanishi vaziyatni yanada keskinlashtirdi. Avvalroq jamoa murabbiyi Maykl Karrik hakamning qarorlarini «tushunarsiz» va «aqldan ozgan» deb atagan edi.
Shuningdek, «MYU» o‘yinga nega 9 daqiqa vaqt qo‘shib berilgani yuzasidan ham javob olmoqchi.
