O‘zbekiston milliy terma jamoasi mart oyida navbatdagi o‘quv-mashg‘ulot yig‘ini doirasida FIFA Series musobaqasida ishtirok etishini bilasiz.
Jahon chempionatiga tayyorgarlik ko‘rayotgan jamoamizning tibbiy shtabiga bir qator tajribali mutaxassislarni jalb etish rejalashtirilgan.
Xususan, uzoq yillar davomida Italiya milliy terma jamoasi shifokori sifatida faoliyat yuritgan, sport tibbiyoti va ortopediya sohasida katta tajribaga ega mutaxassis Enriko Kastellachchi milliy jamoa tibbiy shtabida ish boshlaydi. Kastellachchi Italiya futbol shifokorlari assosiasiyasi prezidenti hamda Italiya ortoped-travmatologlari milliy assosiasiyasi vise-prezidenti sifatida ham faoliyat olib borgan.
Shuningdek, terma jamoa tibbiy shtabiga italiyalik fizioterapevt — Simone Sidjilyo ham jalb etildi. Ushbu mutaxassis faoliyati davomida «Palermo», «Salernitana» va «Benevento» klublarida ishlagan.













