O‘zbekiston milliy terma jamoasining mashg‘ulotlari boshlandi. Uzoq tanaffusdan so‘ng terma jamoaga qaytgan «Paxtakor» yarim himoyachisi Doston Hamdamov o‘z fikrlari bilan o‘rtoqlashdi.
«Ancha yil pauza bo‘lib qolgandi»
— Milliy jamoa safiga qaytganimdan juda xursandman. To‘g‘risini aytsam, ancha vaqtdan beri chaqirilmayotgandim, orada katta pauza bo‘lib qoldi. Hozirda Fabio Kannavaro menga imkoniyat bermoqda va men bu ishonchni oqlashga harakat qilaman. Asosiy maqsadim — jamoa bilan birgalikda Jahon chempionati yo‘llanmasini qo‘lga kiritish va mundialga borish.
Raqiblar haqida: Gabon va Venesuela
— Oldinda bizni FIFA Series turniri doirasida jiddiy bahslar kutmoqda. Gabon bo‘ladimi yoki Venesuela — har ikki jamoa ham yuqori darajadagi raqiblar hisoblanadi. Yaqin kunlar ichida murabbiylar shtabi bilan birgalikda ularning o‘yin uslubini sinchiklab tahlil qilamiz va maydonga tayyor bo‘lib tushamiz.
Kannavaro bilan suhbat
— Yangi bosh murabbiy bilan hozircha alohida, shaxsiy suhbat bo‘lgani yo‘q. Ehtimol, yaqin vaqt ichida bunday muloqot bo‘lib qolar. Hozir bor e’tiborimiz umumiy mashg‘ulotlarga va jamoaviy o‘yinni shakllantirishga qaratilgan.
