Ўзбекистон миллий терма жамоасининг машғулотлари бошланди. Узоқ танаффусдан сўнг терма жамоага қайтган «Пахтакор» ярим ҳимоячиси Достон Ҳамдамов ўз фикрлари билан ўртоқлашди.
«Анча йил пауза бўлиб қолганди»
— Миллий жамоа сафига қайтганимдан жуда хурсандман. Тўғрисини айтсам, анча вақтдан бери чақирилмаётгандим, орада катта пауза бўлиб қолди. Ҳозирда Фабио Каннаваро менга имконият бермоқда ва мен бу ишончни оқлашга ҳаракат қиламан. Асосий мақсадим — жамоа билан биргаликда Жаҳон чемпионати йўлланмасини қўлга киритиш ва мундиалга бориш.
Рақиблар ҳақида: Габон ва Венесуэла
— Олдинда бизни FIFA Series турнири доирасида жиддий баҳслар кутмоқда. Габон бўладими ёки Венесуэла — ҳар икки жамоа ҳам юқори даражадаги рақиблар ҳисобланади. Яқин кунлар ичида мураббийлар штаби билан биргаликда уларнинг ўйин услубини синчиклаб таҳлил қиламиз ва майдонга тайёр бўлиб тушамиз.
Каннаваро билан суҳбат
— Янги бош мураббий билан ҳозирча алоҳида, шахсий суҳбат бўлгани йўқ. Эҳтимол, яқин вақт ичида бундай мулоқот бўлиб қолар. Ҳозир бор эътиборимиз умумий машғулотларга ва жамоавий ўйинни шакллантиришга қаратилган.
