Madridning «Real» klubi markaziy himoyachisi Din Xyoysen mavsum avvalida muxlislar tomonidan hushtaklar bilan kutib olingani borasida o‘z fikrini bildirdi. U bu vaziyatdan ijobiy jihatlarni topa oldi.

«Yakunda bu shunchaki futbolning bir qismi ekanligi ma’lum bo‘ladi. Har bir futbolchida pasayishlar yoki jarohatlar uchrab turadi. Ammo o‘ylaymanki, hamma mening nimalarga qodirligimni biladi va hozirda o‘z darajamni ko‘rsatyapman. Buning uchun har kuni mehnat qilyapman va shu ruhda davom etaman».

«Nazarimda, «Bernabeu» tomoshabinlarining talabchanligi — qaysidir ma’noda yaxshilikka. Bu muxlislar menga ishonishini va men bundan ham ko‘prog‘ini bera olishimni bilishidan dalolat beradi», — deya futbolchining so‘zlaridan iqtibos keltiradi Marca.

Joriy mavsumda 20 yoshli futbolchi 32 ta o‘yinda maydonga tushib, 2 ta gol urdi va 2 ta golli uzatmani amalga oshirdi. Shuningdek, uning hisobida 8 ta sariq va 1 ta qizil kartochka bor. Transfermarkt portali Xyoysenning bozor qiymatini 65 million yevroga baholamoqda.