Мадриднинг «Реал» клуби марказий ҳимоячиси Дин Хёйсен мавсум аввалида мухлислар томонидан ҳуштаклар билан кутиб олингани борасида ўз фикрини билдирди. У бу вазиятдан ижобий жиҳатларни топа олди.

«Якунда бу шунчаки футболнинг бир қисми эканлиги маълум бўлади. Ҳар бир футболчида пасайишлар ёки жароҳатлар учраб туради. Аммо ўйлайманки, ҳамма менинг нималарга қодирлигимни билади ва ҳозирда ўз даражамни кўрсатяпман. Бунинг учун ҳар куни меҳнат қиляпман ва шу руҳда давом этаман».

«Назаримда, «Бернабеу» томошабинларининг талабчанлиги — қайсидир маънода яхшиликка. Бу мухлислар менга ишонишини ва мен бундан ҳам кўпроғини бера олишимни билишидан далолат беради», — дея футболчининг сўзларидан иқтибос келтиради Marca.

Жорий мавсумда 20 ёшли футболчи 32 та ўйинда майдонга тушиб, 2 та гол урди ва 2 та голли узатмани амалга оширди. Шунингдек, унинг ҳисобида 8 та сариқ ва 1 та қизил карточка бор. Transfermarkt портали Хёйсеннинг бозор қийматини 65 миллион еврога баҳоламоқда.