«Real» bosh murabbiyi Alvaro Arbeloa jamoadagi aksariyat futbolchilarning qo‘llab-quvvatlashiga sazovor bo‘lmoqda.

Marca nashri bergan ma’lumotlarga ko‘ra, 43 yoshli mutaxassis «Madrid» kiyinish xonasining mehrini qozona olgan. Murabbiyni jamoada ijobiy, qulay va erkin muhit yaratgani, futbolchilarini omma oldida himoya qilishi hamda shaxsiy suhbatlarda o‘z pozisiyasini aniq bayon etishi uchun hurmat qilishadi.

Bundan tashqari, «Real»ning so‘nggi natijalari (barcha musobaqalarda ketma-ket 5 ta g‘alaba) futbolchilarni Arbeloa yondashuvi to‘g‘ri ekanligiga ishontirdi va ular murabbiy taktikasiga to‘liq ishonishmoqda. Shuningdek, o‘yinchilar Alvaroning yordamchilari faoliyatidan ham hayratda.

Qayd etilishicha, Arbeloani ayniqsa Vinisius Junior, Federiko Valverde, Tibo Kurtua, Orelyen Tchuameni va Antonio Ryudiger faol qo‘llab-quvvatlamoqda. Arbeloa kelasi mavsumda ham «Real» bosh murabbiyi bo‘lib qolishni istaydi va ushbu futbolchilar uning bu intilishini yoqlashmoqda. Shuningdek, Arbeloaning ish uslubi Arda Gyuler, Fran Garsiya va Braim Diasga ham manzur bo‘lmoqda. Marca nashri, shuningdek, Arbeloaning Kilian Mbappe va Djud Bellingemni qanday qo‘llab-quvvatlaganiga ham alohida to‘xtalib o‘tgan.