«Реал» бош мураббийи Альваро Арбелоа жамоадаги аксарият футболчиларнинг қўллаб-қувватлашига сазовор бўлмоқда.

Marca нашри берган маълумотларга кўра, 43 ёшли мутахассис «Мадрид» кийиниш хонасининг меҳрини қозона олган. Мураббийни жамоада ижобий, қулай ва эркин муҳит яратгани, футболчиларини омма олдида ҳимоя қилиши ҳамда шахсий суҳбатларда ўз позициясини аниқ баён этиши учун ҳурмат қилишади.

Бундан ташқари, «Реал»нинг сўнгги натижалари (барча мусобақаларда кетма-кет 5 та ғалаба) футболчиларни Арбелоа ёндашуви тўғри эканлигига ишонтирди ва улар мураббий тактикасига тўлиқ ишонишмоқда. Шунингдек, ўйинчилар Альваронинг ёрдамчилари фаолиятидан ҳам ҳайратда.

Қайд этилишича, Арбелоани айниқса Винисиус Жуниор, Федерико Вальверде, Тибо Куртуа, Орельен Тчуамени ва Антонио Рюдигер фаол қўллаб-қувватламоқда. Арбелоа келаси мавсумда ҳам «Реал» бош мураббийи бўлиб қолишни истайди ва ушбу футболчилар унинг бу интилишини ёқлашмоқда. Шунингдек, Арбелоанинг иш услуби Арда Гюлер, Фран Гарсия ва Браим Диасга ҳам манзур бўлмоқда. Marca нашри, шунингдек, Арбелоанинг Килиан Мбаппе ва Джуд Беллингемни қандай қўллаб-қувватлаганига ҳам алоҳида тўхталиб ўтган.