Londonning «Chelsi» klubi bosh murabbiy Liam Rosenyor faoliyatini yaqin vaqt ichida baholashni rejalashtirmayapti. The Telegraph nashri xabariga ko‘ra, ingliz mutaxassisi hatto jamoa kelasi mavsumda Chempionlar ligasiga yo‘llanma ololmagan taqdirda ham ishdan olinmaydi.

Manbaga ko‘ra, klub rahbariyati 41 yoshli murabbiy jamoani faqat 2026 yil yanvar oyida qabul qilib olganini inobatga olmoqda. Shu sababli u natijalar uchun to‘liq javobgar deb hisoblanmayapti.

Qayd etilishicha, kelasi yozda «Chelsi» tarkibni kuchaytirishni rejalashtirgan. Bu orqali Rosenyorga jamoa o‘yiniga yanada kattaroq ta’sir ko‘rsatish imkoniyati yaratiladi.

Liam Rosenyor «Chelsi»ni 2026 yil 8 yanvardan beri boshqarib kelmoqda. Uning qo‘l ostida jamoa barcha musobaqalarda 19 ta o‘yin o‘tkazib, 10 ta g‘alaba, 2 ta durang va 7 ta mag‘lubiyat qayd etgan.