Лондоннинг «Челси» клуби бош мураббий Лиам Росеньор фаолиятини яқин вақт ичида баҳолашни режалаштирмаяпти. The Telegraph нашри хабарига кўра, инглиз мутахассиси ҳатто жамоа келаси мавсумда Чемпионлар лигасига йўлланма ололмаган тақдирда ҳам ишдан олинмайди.

Манбага кўра, клуб раҳбарияти 41 ёшли мураббий жамоани фақат 2026 йил январь ойида қабул қилиб олганини инобатга олмоқда. Шу сабабли у натижалар учун тўлиқ жавобгар деб ҳисобланмаяпти.

Қайд этилишича, келаси ёзда «Челси» таркибни кучайтиришни режалаштирган. Бу орқали Росеньорга жамоа ўйинига янада каттароқ таъсир кўрсатиш имконияти яратилади.

Лиам Росеньор «Челси»ни 2026 йил 8 январдан бери бошқариб келмоқда. Унинг қўл остида жамоа барча мусобақаларда 19 та ўйин ўтказиб, 10 та ғалаба, 2 та дуранг ва 7 та мағлубият қайд этган.