Germaniyalik sobiq darvozabon Yens Lemann Angliya liga kubogining yaqinginada bo‘lib o‘tgan «Manchester Siti»ga qarshi final o‘yinida Kepa Arrisabalaga yo‘l qo‘ygan muvaffaqiyatsizlikka munosabat bildirdi.

Uchrashuv «kanonirlar»ning 0:2 hisobidagi mag‘lubiyati bilan yakunlandi. Ispaniyalik posbon «shaharliklar» tomonidan kiritilgan gollardan birida qo‘pol xatoga yo‘l qo‘ygan edi.

«Artetaning qarorini xato deb hisoblamayman. Kepa — yaxshi darvozabon, u jamoaning finalga chiqishiga yordam berdi va o‘zini ko‘rsata oldi. O‘sha vaziyatda uning to‘pni egallab olishga harakat qilganining o‘zi ko‘p narsadan dalolat beradi. Ehtimol, u vaziyatni noto‘g‘ri baholagandir, lekin bunday holat hammada ham sodir bo‘lib turadi», — deya «Arsenal»ning sobiq posboni Lemannning so‘zlarini keltirmoqda Sport Bible.

Eslatib o‘tamiz, final uchrashuvida Arrisabalaga londonliklarning asosiy darvozaboni David Rayyaning o‘rnini egallagan edi.