FIFA 2026 yilgi Jahon chempionati uchun har bir terma jamoa qaydnomasiga 26 nafar futbolchini kiritishi mumkinligini ma’lum qildi. Jamoalar dunyo futbol forumi uchun yakuniy tarkiblarni 30 mayga qadar taqdim etishlari shart.
Jahon chempionati 11 iyun kuni start oladi. Shu kuni musobaqaning ochilish o‘yinida Meksika va Janubiy Afrika Respublikasi (JAR) terma jamoalari o‘zaro to‘qnash kelishadi. Bahs Meksikadagi mashhur «Asteka» stadionida bo‘lib o‘tadi.
Bo‘lajak Jahon chempionati tarixda ilk bor 32 ta emas, balki 48 ta jamoa ishtirokida o‘tkaziladi.
Ta’kidlash joizki, 2026 yilgi mundialda Argentina terma jamoasi amaldagi chempion sifatida o‘z unvonini himoya qiladi. O‘tgan Jahon chempionati finalida «albiseleste» Fransiyani penaltilar seriyasida (asosiy vatqdagi 3:3 hisobidan so‘ng) mag‘lub etgan edi.
