Hozirda ijara asosida «Tottenxem»da to‘p surayotgan «PSJ» hujumchisi Randal Kolo-Muani «Yuventus»ga qaytishni xohlamoqda. Bu haqda La Gazzetta dello Sport nashri xabar bermoqda.

Manba bergan ma’lumotlarga ko‘ra, fransuz hujumchisi o‘tgan yilning sentyabr oyidan beri o‘ynayotgan «Tottenxem»da qolish niyatida emas. Ta’kidlanishicha, futbolchi Angliyaga ijaraga ketishidan oldin faoliyat yuritgan «Yuventus» safiga qayta qo‘shilishni istamoqda.

«Shporlar» tarkibida Kolo-Muani barcha turnirlarda 34 ta uchrashuvda ishtirok etib, raqiblar darvozasini 5 bor ishg‘ol qildi va 4 ta golli uzatmani amalga oshirdi.

Transfermarkt ma’lumotlariga ko‘ra, 27 yoshli hujumchining bozor qiymati 22 million yevroni tashkil etadi.