«Liverpul»ning sobiq murabbiyi Yurgen Klopp hujumchi Muhammad Salohning yaqin orada jamoani tark etishi haqidagi fikrlari bilan o‘rtoqlashdi.

Yaqinda 33 yoshli misrlik futbolchi joriy mavsum yakunida jamoadan ketishini e’lon qilgan edi.

«Saloh uzoq yillar davomida eng mahsuldor o‘yinchilardan biri bo‘lib keldi va buning o‘zi hamma narsani aytib turibdi. Uning so‘nggi o‘yinida barchaning yuzida tabassum bo‘lishini hamda «Liverpul» muxlislari o‘z ko‘z o‘ngida shunday aql bovar qilmas faoliyat kechganini anglab, baxtiyor bo‘lishlarini juda-juda istayman», — deya 2015 yildan 2024 yilgacha «qizillar»ni boshqargan Kloppning so‘zlarini keltiradi The Anfield Wrap.

Muhammad Saloh «Liverpul» sharafini 2017 yildan beri himoya qilib kelayotgan edi. Uning shartnomasi 2027 yilgacha amal qilishiga qaramay, yozda u erkin agent sifatida qo‘yib yuboriladi.