«Everton»ning hujumkor yarim himoyachisi Iliman Ndiaye faoliyatini Angliya Premyer-ligasining yanada nufuzliroq klubida davom ettirishi mumkin. Bu haqda Teamtalk jurnalistlari xabar bermoqda.

Manbaning bergan ma’lumotlariga ko‘ra, futbolchining transferiga «Liverpul» qiziqish bildirmoqda. Mersisaydliklar Ilimanni kelayotgan yozda jamoani tark etadigan misrlik Muhammad Salohga o‘rinbosar sifatida ko‘rishmoqda.

Ndiayening bozor qiymati 50 million yevroga baholanmoqda. Tomonlar o‘rtasidagi amaldagi shartnoma muddati 2029 yilning iyun oyi oxirida tugaydi.

APLning joriy mavsumida vinger 25 ta o‘yinda maydonga tushib, 6 ta gol urdi va 3 ta golli uzatmani amalga oshirdi.