Italiyaning «Roma» klubi darvozaboni Mile Svilar kelib chiqishiga ko‘ra serb bo‘lsa-da, Belgiyada tug‘ilgan. O‘z vaqtida, 2021 yilning sentyabr oyida u otasi Ratkoning ta’siri ostida Serbiyani tanlagan va ushbu Bolqon mamlakati terma jamoasi safida bir taym o‘ynashga ham ulgurgan edi. Biroq keyinchalik u Belgiya sharafini himoya qilishni afzal ko‘rishini e’lon qildi.
Ammo FIFA bu ishga aralashib, hozircha Svilarning belgiyaliklar safida maydonga tushishiga ruxsat bermayapti. Serblar ham uning bunday munosabatidan xafa bo‘lib, Svilarni terma jamoaga chaqirishdan bosh tortishdi. Reglamentga ko‘ra, ma’lum shartlar asosida terma jamoani o‘zgartirish mumkin. Ulardan biri — futbolchi avvalgi terma jamoasida o‘ynagan vaqtida 21 yoshdan oshmagan bo‘lishi kerak.
Boshqa shartlar ham mavjud, biroq Svilar aynan shu qoidani buzgan. U Qatar terma jamoasiga qarshi o‘rtoqlik uchrashuvida serblar safida bir taym o‘ynagan vaqtida 22 yoshda edi — e’tiborlisi, u tug‘ilgan kunini o‘yindan atigi to‘rt kun oldin nishonlagan edi. Endi esa mana shu kichik farq unga juda qimmatga tushishi mumkin.
