Braziliya futbol konfederasiyasi rasmiy saytida ikki nafar futbolchi milliy terma jamoa ixtiyorini tark etgani haqida ma’lumot e’lon qilindi. «Selesao» lagerini nafaqat vinger Rafinya, balki himoyachi Uesli ham tark etdi. «Barselona» va «Roma» futbolchilarida mushak jarohatlari aniqlangan.

Xabarda ta’kidlanishicha, Karlo Anchelotti Rafinya va Ueslining jarohatlaridan so‘ng Braziliya terma jamoasiga boshqa futbolchilarni chaqirmaslikka qaror qilgan.

Avvalroq «Barselona» Rafinya ushbu jarohat tufayli taxminan besh haftani o‘tkazib yuborishini e’lon qilgan edi. Bu shuni anglatadiki, braziliyalik futbolchi may oyigacha maydonga tusha olmaydi va bir qator muhim o‘yinlarni, jumladan, Chempionlar ligasi chorak finali doirasidagi «Atletiko»ga qarshi bahslarni o‘tkazib yuboradi.