Xorvatiya milliy terma jamoasi bosh murabbiyi Zlatko Dalich Luka Modrichning o‘yinlari borasida o‘z fikrini bildirdi.
Yaqinda Italiyaning «Milan» klubi markaziy yarim himoyachisi Kolumbiya terma jamoasiga qarshi kechgan o‘rtoqlik uchrashuvida (2:1) ishtirok etdi va jamoasining g‘alabasiga hissa qo‘shdi.
«U bizning sardorimiz, asosiy yo‘lchi yulduzimiz va yetakchimiz. Uni ko‘p bora hisobdan chiqarishga urinishdi, ammo u noyob va takrorlanmas futbolchi. Umid qilamanki, Luka bizga Jahon chempionatida katta muvaffaqiyatlarga erishishda yordam beradi», — dedi Dalich.
Joriy mavsumda 40 yoshli Modrich barcha turnirlarda 32 ta o‘yinda maydonga tushib, o‘z hisobiga ikkita gol va uchta golli uzatmani yozdirib qo‘ydi.
