«Barselona» sobiq prezidenti Xosep Mariya Bartomeu Lionel Messining 2021 yilda klubni tark etishi haqida fikr bildirdi.

«Agar klubning yangi rahbariyati kerakli choralarni ko‘rganida, Leo Messi bilan shartnomani uzaytirish va yangi futbolchilarni jalb qilish to‘liq mumkin edi. Ayb mening merosimda emas, balki moliyaviy feyr-pley qoidalari bilan bog‘liq, chunki yangi rahbariyat zararni 555 mln yevrogacha oshirdi. Liga bu raqamni ko‘rgach, qayta tekshiruv o‘tkazdi va haqiqiy zarar 283 mln yevro ekanini aniqladi. «Barselona» o‘z taklifini saqlab qoldi, liga uni ma’qulladi, ammo natijada klub feyr-pley qoidalariga rioya qilish imkoniyatini yo‘qotdi va bu holat haligacha tiklangani yo‘q», — deydi Bartomeu.

Xosep Mariya Bartomeu «Barselona» prezidenti lavozimida 6,5 yil faoliyat yuritgan — 2014 yil 23 yanvardan 2020 yil 27 oktyabrgacha.

Lionel Messi 2021 yil avgust oyida klubning moliyaviy muammolari sabab «Barselona»ni tark etgan edi. Tomonlar shartnomani uzaytirish bo‘yicha kelishib olgan bo‘lsa-da, Ispaniya La Ligasining qat’iy moliyaviy qoidalari tufayli bitim rasman imzolanmagan.