«Barselona» klubi stadion tomini yopish ishlarini yakunlash uchun 2027/2028 yilgi mavsumning dastlabki bir necha oyi davomida «Kamp Nou»ni tark etishga majbur bo‘ladi. Mundo Deportivo nashrining xabar berishicha, klub katta ehtimol bilan yana «Monjuik»dagi «Olimpiya stadioni»da to‘p suradi.

Avvalroq, 2027 yilning yoziga rejalashtirilgan tomni montaj qilish ishlari kutilganidan ko‘proq vaqt talab qilishi haqida xabar berilgan edi. Dastlab «Barselona» rahbariyati bu ishlarni taxminan to‘rt yarim oyda yakunlashni ko‘zda tutgan edi. Biroq muhandislar yetti oygacha bo‘lgan muddatni ko‘rsatishmoqda, bu vaqt davomida arenada o‘yinlar o‘tkazish imkonsiz bo‘ladi.

Klubning operasion direktori Joan Sentellesning ta’kidlashicha, «Barselona» qurilish ishlari uchun stadionni bo‘shatish maqsadida 2026/2027 yilgi mavsumning so‘nggi uchta turini va keyingi chempionatning dastlabki uchta o‘yinini safarda o‘tkazishni rejalashtirmoqda. Zarurat tug‘ilganda, klub vaqtinchalik «Estadi Yoxan Kruiff» stadioniga ko‘chib o‘tishi yoki «Monjuik»dagi «Olimpiya stadioni»ga qaytishi mumkin. Ammo ikkinchi variant moliyaviy xarajatlar tufayli istalmagan holat, birinchisi esa La Liganing sig‘im bo‘yicha talablariga (kamida 15 ming o‘rindiq) javob bermaydi.