«Atletiko»ning sobiq himoyachisi Filipe Luis Madrid klubi u o‘ynagan davrdagidan ko‘ra ancha o‘sgani va yaxshilanganini ta’kidladi. Braziliyalik futbolchi 2010 yildan 2019 yilga qadar Madrid jamoasi sharafini himoya qilgan.
"Men bu klubda juda baxtli edim. Biz katta muvaffaqiyatlarga erishganmiz, lekin hozir his qilayotgan eng asosiy tuyg‘um — "Atletiko" qanday darajaga chiqqanidan faxrlanishdir. Klub men ketgan vaqtdagidan ko‘ra beqiyos darajada kattalashdi. Bunda rahbariyatning, Simeonening va yuqori saviyali futbolchilar kelganining hissasi benihoya katta. Hozirgi tarkibda mahorati hayratlanarli darajada bo‘lgan futbolchilar bor.
Men qarshi o‘ynash juda qiyin bo‘lgan jamoani ko‘ryapman: ular ham chuqur himoyalanishni, ham yuqori pressing qilishni va vertikal harakatlanishni bilishadi. Shuning uchun "Atletiko"ga qarshi o‘ynash doimo og‘ir. Ko‘z tegmasin-u, lekin ular Chempionlar Ligasi [chorak finalida] "Barselona"dan o‘tishlariga umid qilaman — undan keyin juda qiziq bo‘ladi.
Hozirgi "Atletiko"ga qarab faxrlanaman: bu klub avvalgidan ko‘ra ancha yaxshilandi va yuksaldi", — dedi Filipe Luis.
