Misr terma jamoasi direktori Ibrohim Hassan hujumchi Muhammad Saloh «Liverpul»ni tark etganidan so‘ng MLSga (AQSH chempionati) o‘tmasligi kerak, deb hisoblaydi.
«Men Salohning Yevropada qolishini istardim. Unga «Pari Sen-Jermen», «Bavariya» va A Seriyaning bir qator klublari tomonidan qiziqish borligi haqida eshitdim.
MLSga o‘tish? Muhammad omma e’tiboridan juda uzoqda qolib ketadi. Bunday holatda siz Salohni xuddi men hozir Messini eslayotganimdan yaxshiroq eslamaysiz — hatto uning o‘yinlarini kuzatishga harakat ham qilmayapman.
Agar Salohda Yevropadan takliflar bo‘lmasa, u holda Saudiya Arabistoniga o‘tish yaxshi variant bo‘lardi, ayniqsa, ushbu ligada Krishtianu Ronaldu kabi mashhur nomlar borligini hisobga olsak», — deya Hassanning so‘zlaridan iqtibos keltirmoqda Reuters agentligi On Sports nashriga tayanib.
Eslatib o‘tamiz, avvalroq Saloh joriy mavsum ingliz klubidagi so‘nggisi bo‘lishini e’lon qilgan edi. Misrlik vinger 2017 yildan beri mersisaydliklar sharafini himoya qilib kelmoqda. Saloh Angliya chempionatida 310 ta o‘yin o‘tkazib, 189 ta gol urdi va 92 ta golli uzatmani amalga oshirdi.
