Миср терма жамоаси директори Иброҳим Ҳассан ҳужумчи Муҳаммад Салоҳ «Ливерпул»ни тарк этганидан сўнг МЛСга (АҚШ чемпионати) ўтмаслиги керак, деб ҳисоблайди.

«Мен Салоҳнинг Европада қолишини истардим. Унга «Пари Сен-Жермен», «Бавария» ва А Сериянинг бир қатор клублари томонидан қизиқиш борлиги ҳақида эшитдим.

МЛСга ўтиш? Муҳаммад омма эътиборидан жуда узоқда қолиб кетади. Бундай ҳолатда сиз Салоҳни худди мен ҳозир Мессини эслаётганимдан яхшироқ эсламайсиз — ҳатто унинг ўйинларини кузатишга ҳаракат ҳам қилмаяпман.

Агар Салоҳда Европадан таклифлар бўлмаса, у ҳолда Саудия Арабистонига ўтиш яхши вариант бўларди, айниқса, ушбу лигада Криштиану Роналду каби машҳур номлар борлигини ҳисобга олсак», — дея Ҳассаннинг сўзларидан иқтибос келтирмоқда Reuters агентлиги On Sports нашрига таяниб.

Эслатиб ўтамиз, аввалроқ Салоҳ жорий мавсум инглиз клубидаги сўнггиси бўлишини эълон қилган эди. Мисрлик вингер 2017 йилдан бери мерсисайдликлар шарафини ҳимоя қилиб келмоқда. Салоҳ Англия чемпионатида 310 та ўйин ўтказиб, 189 та гол урди ва 92 та голли узатмани амалга оширди.