«Barselona» hujumchisi Ferran Torres faoliyatini «Manchester Yunayted»da davom ettirishi mumkin. Bu haqda jurnalist Ekrem Konur xabar bermoqda.
Manbaning ma’lumotlariga ko‘ra, agar Joshua Zirkzee klubni tark etsa, «qizil iblislar» Torres bilan shartnoma imzolash imkoniyatini ko‘rib chiqishadi. Shu bilan birga, hujumchining ehtimoliy transferi Markus Reshford bilan bog‘liq bitimga hech qanday aloqador bo‘lmasligi ta’kidlangan.
Qayd etilishicha, «Barselona» sotib yuborishni istisno etmayotgan Torres atrofidagi vaziyatni «Arsenal», «Inter» va «Atletiko» klublari ham diqqat bilan kuzatib bormoqda.
Joriy mavsumda 26 yoshli Torres barcha turnirlarda 40 ta o‘yinda maydonga tushib, 16 ta gol urdi va bitta golli uzatmani amalga oshirdi. Transfermarkt ekspertlari futbolchining bozor qiymatini 50 million yevroga baholamoqda.
