Professional boksning yarim o‘rta vazn toifasi vakili Shahram G‘iyosov o‘zi singari chempionlik uchun da’vogar bo‘lgan Jek Katteralga qarshi ringga ko‘tarilishi kutilmoqda. Bu haqda ESPN nashri xabar berdi.
Qayd etilishicha, ikki bokschi o‘rtasidagi bellashuv 23-may kuni bo‘lib o‘tadigan katta boks oqshomiga belgilangan. Mazkur jang Oleksandr Usik hamda Riko Verhoven o‘rtasidagi markaziy jangdan avval o‘tkaziladi. Turnir Misrda Giza piramidalari qarshisida o‘tkazilishi rejalashtirilgan.
Manbalarga ko‘ra, Katteral va G‘iyosov o‘rtasidagi jang bo‘yicha kelishuvga erishilgan va rasmiy xabar yaqin kunlarda e’lon qilinadi.
