Hujumchi Joshua Zirkzee «Manchester Yunayted»ni tark etishni istamayapti.

Daily Mail nashri bergan ma’lumotlarga ko‘ra, niderlandiyalik futbolchi «MYU» yevrokuboklarga qaytganidan so‘ng, Maykl Kerrik boshqaruvida o‘z imkoniyatiga ega bo‘lishiga ishonyapti. Futbolchiga yaqin manbalar «qizil iblislar» mavsumlar oralig‘ida hujum chizig‘ini kuchaytirishiga shubha bilan qarashmoqda. Shuningdek, o‘yinlar taqvimidagi uchrashuvlar soni ortishini inobatga olgan holda, Zirkzee Kerrik unga maydonda ko‘proq imkoniyat beradi deb hisoblamoqda.

Joshua Zirkzee 2024 yilda «Bolonya»dan «Manchester Yunayted»ga 42 million yevro evaziga o‘tgan edi. Uning shartnomasi 2029 yilning 30 iyuniga qadar mo‘ljallangan. Joriy mavsumda hujumchi barcha turnirlarda 20 ta o‘yinda maydonga tushib, o‘z hisobiga ikkita gol va bitta golli uzatmani yozib qo‘ydi.