«Barselona» va Ispaniya terma jamoasi yarim himoyachisi Pedri jamoadoshi Rafinya Diasning jarohati haqidagi savolga javob berdi.
29 yoshli vinger Braziliya terma jamoasi safida Fransiyaga qarshi kechgan yaqindagi o‘rtoqlik uchrashuvida jarohat olgan edi.
«Bu achinarli holat, lekin bir gapni aytaman: yarim kuch bilan o‘ynab bo‘lmaydi — bunday vaziyatda jarohat olish ehtimoli uch barobarga ortadi. Bu futbolchi qilishi mumkin bo‘lgan eng yomon narsa. Afsuski, jarohatlar — o‘yinning bir qismi. Agar ular sodir bo‘lishi kerak bo‘lsa, baribir sodir bo‘ladi», — deya Pedrining so‘zlaridan iqtibos keltirmoqda Barca Universal.
4 aprel kuni «Barselona» chempionat doirasida Madridning «Atletiko» klubi bilan to‘qnash keladi, 8 va 14 aprel kunlari esa Chempionlar ligasida yana «matraschilar» bilan kuch sinashadi. Rafinya ushbu bahslarning barchasini o‘tkazib yuboradi.
