«Барселона» ва Испания терма жамоаси ярим ҳимоячиси Педри жамоадоши Рафинья Диаснинг жароҳати ҳақидаги саволга жавоб берди.

29 ёшли вингер Бразилия терма жамоаси сафида Францияга қарши кечган яқиндаги ўртоқлик учрашувида жароҳат олган эди.

«Бу ачинарли ҳолат, лекин бир гапни айтаман: ярим куч билан ўйнаб бўлмайди — бундай вазиятда жароҳат олиш эҳтимоли уч баробарга ортади. Бу футболчи қилиши мумкин бўлган энг ёмон нарса. Афсуски, жароҳатлар — ўйиннинг бир қисми. Агар улар содир бўлиши керак бўлса, барибир содир бўлади», — дея Педрининг сўзларидан иқтибос келтирмоқда Barca Universal.

4 апрель куни «Барселона» чемпионат доирасида Мадриднинг «Атлетико» клуби билан тўқнаш келади, 8 ва 14 апрель кунлари эса Чемпионлар лигасида яна «матрасчилар» билан куч синашади. Рафинья ушбу баҳсларнинг барчасини ўтказиб юборади.