Joan Garsiya ilk bor Ispaniya terma jamoasi safida maydonga tushdi. «Barselona»ning 24 yoshli darvozaboni Misrga qarshi kechgan va golsiz durang bilan yakunlangan o‘rtoqlik uchrashuvining ikkinchi bo‘limida zaxiradan o‘yinga qo‘shildi.
«Tanaffus paytida mendan chigal yozdi mashqlarini boshlashni so‘rashdi — o‘sha lahzada debyutim yaqinligini his qildim, lekin bunga to‘liq ishonish uchun maydonga tushish kerak edi. Ta’riflab bo‘lmas tuyg‘ular. Terma jamoada o‘ynash — bolalikdan beri orzu qilgan narsam edi va mana, bu orzu amalga oshdi. Men buning uchun yillar davomida mehnat qildim va hozir juda faxrlanaman», — deya Garsiyaning so‘zlarini keltirmoqda Barca Universal.
E’tiborli jihati shundaki, darvozabonning terma jamoadagi debyuti «Espanyol» stadionida yuz berdi. Bu jamoa uning qadrdon klubi hisoblanib, Garsiya o‘tgan yilning yozida ashaddiy raqib — «Barselona» safiga o‘tgan edi.
