"Tottenxem Xotspur" himoyachisi, hozirda ijara asosida "Gamburg"da to‘p surayotgan Luka Vushkovich "Liverpul" e’tiboriga tushdi. Bu haqda Bild nashri xabar bermoqda.
Mersisaydliklar joriy mavsum yakunida futbolchini sotib olish imkoniyatini jiddiy ko‘rib chiqmoqdalar. "Barselona" va "Chelsi" ham o‘yinchining chiqishlarini kuzatib borishmoqda — ushbu jamoalarning istalgan biri uchun Vushkovichning sotib olinishi uzoq muddatli sarmoyaga aylanishi mumkin. Qayd etilishicha, "qizillar" moliyaviy jihatdan ushbu transferni amalga oshirishga qodir, biroq hozircha klub bu yo‘nalishda aniq qadamlar tashlaydimi yoki yo‘qmi, noma’lum.
Joriy klub mavsumidagi 26 ta o‘yinda Vushkovich 5 ta gol urdi va bitta golli uzatmani amalga oshirdi. Transfermarkt portali ma’lumotlariga ko‘ra, himoyachining hozirgi bozor qiymati 60 million yevroni tashkil etadi.
