"Manchester Siti" va Argentina terma jamoasining sobiq hujumchisi Serxio Aguero "albiseleste"ning 2022 yilgi Jahon chempionatidagi zafari haqidagi xotiralari bilan o‘rtoqlashdi.

"Bu barcha argentinaliklar uchun aql bovar qilmaydigan voqea bo‘ldi. O‘sha paytgacha Jahon chempionatidagi oxirgi g‘alabamizdan beri juda ko‘p vaqt o‘tgan edi. Biz ajoyib turnir o‘tkazib va menimcha, tarixdagi eng yaxshi finalda g‘alaba qozonib, yangi zafarni qo‘lga kiritdik. Leo bu sovringa loyiq edi, xuddi butun jamoa, jumladan futbolchilar va murabbiylar kabi. Ular uchun juda xursand bo‘ldim.

Men o‘ynay olmadim, chunki yurakdagi muammolar tufayli faoliyatimni tugatishga majbur bo‘lgandim, lekin butun jamoa meni ushbu bayramning bir qismi ekanligimni his qilishga majbur etdi. Bu nafaqat menga, balki ushbu titulga o‘z hissasini qo‘shgan, ammo turli sabablarga ko‘ra turnirda ishtirok eta olmagan boshqa ko‘plab o‘yinchilarga ham tegishli.

Bu Leo va ishtirok etgan barcha yigitlarning buyukligidan dalolat beradi. Haqiqatan ham ular bizning nomimizdan maydonda jang qilishayotganini his qildik. O‘yin uslubi, ruhiyat va faqat argentinaliklarga xos bo‘lgan noyob o‘yin identiteti. Bayram tantanalarida ular bilan birga bo‘lish imkoniyatidan juda mamnun bo‘ldim, ularga meni ushbu voqeaning bir bo‘lagi bo‘lishga ruxsat berganlari uchun rahmat aytishdan hech qachon to‘xtamayman — bu hayotimdagi eng go‘zal xotiralardan biri", — deya Agueroning so‘zlarini keltiradi Goal.com.