«Bavariya» himoyachisi Konrad Laymer Chempionlar Ligasi chorak finali doirasidagi Madridning «Real» klubiga qarshi bo‘lajak qarama-qarshilik haqidagi fikrlari bilan o‘rtoqlashdi.
Mazkur jamoalar o‘rtasidagi ilk uchrashuv 7 aprel kuni Ispaniya poytaxtida bo‘lib o‘tsa, javob bahsi 15 aprel kuni Myunxenda o‘tkaziladi.
«Bizni individual mahorati yuqori bo‘lgan futbolchilarga ega ikkita ajoyib jamoa o‘rtasidagi jang kutmoqda. Biz aynan shunday o‘yinlar uchun har kuni astoydil mashg‘ulot o‘tkazamiz va maydonga tushamiz. Keyingi bosqichga chiqish uchun bizda barcha imkoniyatlar yetarli. Shunchaki, o‘sha kuni raqibdan ko‘ra yaxshiroq o‘yin ko‘rsatishimiz kerak», — deya Laymerning so‘zlarini keltiradi Madrid Universal.
Eslatib o‘tamiz, Chempionlar Ligasining o‘tgan mavsumida Vensan Kompani jamoasi 1/4 finalga qadar yetib borgan va unda Milanning «Inter» klubiga imkoniyatni boy bergan edi.
