«Бавария» ҳимоячиси Конрад Лаймер Чемпионлар Лигаси чорак финали доирасидаги Мадриднинг «Реал» клубига қарши бўлажак қарама-қаршилик ҳақидаги фикрлари билан ўртоқлашди.
Мазкур жамоалар ўртасидаги илк учрашув 7 апрель куни Испания пойтахтида бўлиб ўтса, жавоб баҳси 15 апрель куни Мюнхенда ўтказилади.
«Бизни индивидуал маҳорати юқори бўлган футболчиларга эга иккита ажойиб жамоа ўртасидаги жанг кутмоқда. Биз айнан шундай ўйинлар учун ҳар куни астойдил машғулот ўтказамиз ва майдонга тушамиз. Кейинги босқичга чиқиш учун бизда барча имкониятлар етарли. Шунчаки, ўша куни рақибдан кўра яхшироқ ўйин кўрсатишимиз керак», — дея Лаймернинг сўзларини келтиради Madrid Universal.
Эслатиб ўтамиз, Чемпионлар Лигасининг ўтган мавсумида Венсан Компани жамоаси 1/4 финалга қадар етиб борган ва унда Миланнинг «Интер» клубига имкониятни бой берган эди.
