Bosh murabbiy Jennaro Gattuzo va koordinator Janluidji Buffon Italiya terma jamoasi Jahon chempionatiga chiqa olmaganidan so‘ng o‘z faoliyatini davom ettirmaydigan bo‘ldi.
Italiyaliklar JCH-2026 yo‘llanmasi uchun kechgan pley-off finalida Bosniya va Gersegovina terma jamoasiga penaltilar seriyasida imkoniyatni boy berib, muvaffaqiyatsizlikka uchradilar. Sky Sport nashrining xabar berishicha, barcha ma’lumotlar Gattuzo va Buffon yaqin orada o‘z lavozimlarini tark etishini ko‘rsatmoqda.
«Skuadra adzurra» qatorasiga uchinchi mundialda ishtirok etmaydigan bo‘ldi. Jennaro Gattuzo o‘tgan yilning yozida jamoani qabul qilib olgan edi — uning qo‘l ostida jamoa saralash guruhida Norvegiyani quvib o‘ta olmadi va shu sababli o‘tish o‘yinlarida ishtirok etishga majbur bo‘ldi.
