Mashhur insayder Fabrisio Romano Italiya terma jamoasi va «Inter» himoyachisi Alessandro Bastonining kataloniyaliklar lageriga o‘tishi borasidagi mish-mishlarga oydinlik kiritdi.

So‘nggi kunlarda «ko‘k-anorranglilar»ning 26 yoshli italiyalik yulduzga bo‘lgan qiziqishi haqida xabarlar ko‘paygan edi. Biroq Romanoning ta’kidlashicha, hozircha ikki klub o‘rtasida rasmiy muzokaralar boshlangani yo‘q.

Shu bilan birga, ekspert ushbu transferning moliyaviy tomonlariga to‘xtalib o‘tdi:

«Aniq narsa shuki, Bastonining transferi uchun 50 million yevro yetarli bo‘lmaydi. «Inter» o‘z yetakchisini bundan ancha yuqori mablag‘ evaziga qo‘yib yuborishi mumkin».

Ma’lumot uchun, Bastoni «neradzurrilar» mudofaasining asosiy figurasi hisoblanadi va uning Milan klubi bilan amaldagi shartnomasi 2028 yilgacha mo‘ljallangan. Hozirda uning bozor qiymati 70-80 million yevro atrofida baholanmoqda. «Barselona» esa moliyaviy qiyinchiliklarga qaramay, mudofaani kuchaytirish uchun variantlarni ko‘rib chiqishda davom etmoqda.