«Manchester Yunayted»ning afsonaviy sobiq hujumchisi Ueyn Runi Bukayo Sakaning muammolari haqidagi fikrlari bilan o‘rtoqlashdi.
Londonning «Arsenal» klubi vingeri joriy mavsumdagi o‘yini u qadar yorqin chiqmayotgani sababli tez-tez tanqidlarga uchramoqda.
«Sakaga juda katta bosim o‘tkazilayotganini hisobga olish kerak. Edegor yo‘qligi sababli u mavsumning katta qismida sardorlik bog‘ichi bilan maydonga tushmoqda. «Arsenal»ning turnir jadvalidagi holatini inobatga olsak, sovrinlarni qo‘lga kiritish zarurligi bilan bog‘liq kuchlanish tobora ortib borishi mumkin va bu qo‘shimcha qiyinchiliklarni yuzaga keltiradi. Joriy mavsumda Bukayoda hamma narsa ham ko‘ngildagidek chiqmayapti, lekin u fantastik futbolchi. Uning salohiyati qanday ekanligini hammamiz tushunib turibmiz», — dedi Runi BBC podkastida.
Mikel Arteta shogirdlari Premyer-liga turnir jadvalida 70 ochko bilan peshqadamlik qilmoqda va «Manchester Siti»ni (61 ochko) ortda qoldirmoqda.
