«Манчестер Юнайтед»нинг афсонавий собиқ ҳужумчиси Уэйн Руни Букайо Саканинг муаммолари ҳақидаги фикрлари билан ўртоқлашди.

Лондоннинг «Арсенал» клуби вингери жорий мавсумдаги ўйини у қадар ёрқин чиқмаётгани сабабли тез-тез танқидларга учрамоқда.

«Сакага жуда катта босим ўтказилаётганини ҳисобга олиш керак. Эдегор йўқлиги сабабли у мавсумнинг катта қисмида сардорлик боғичи билан майдонга тушмоқда. «Арсенал»нинг турнир жадвалидаги ҳолатини инобатга олсак, совринларни қўлга киритиш зарурлиги билан боғлиқ кучланиш тобора ортиб бориши мумкин ва бу қўшимча қийинчиликларни юзага келтиради. Жорий мавсумда Букайода ҳамма нарса ҳам кўнгилдагидек чиқмаяпти, лекин у фантастик футболчи. Унинг салоҳияти қандай эканлигини ҳаммамиз тушуниб турибмиз», — деди Руни BBC подкастида.

Микель Артета шогирдлари Премьер-лига турнир жадвалида 70 очко билан пешқадамлик қилмоқда ва «Манчестер Сити»ни (61 очко) ортда қолдирмоқда.