«Манчестер Сити» трансфер ойнасининг сўнгги ҳафтаси жуда қизғин ўтишини кутмоқда. Клуб футбол директори Угу Вияна Родри ва Нико Гонсалеснинг кетиши ортидан ярим ҳимоя чизиғини кучайтириш учун янги футболчи қидиришда давом этмоқда.

«Лилль» билан музокараларда силжиш кузатилган ва Айюб Буаддининг 85 миллион фунт стерлинглик трансфери амалга ошишга яқинлашган. Шунга қарамай, «Манчестер Сити» камида яна бир ярим ҳимоячини ўз сафига қўшиб олиш ниятида.

«Челси» футболчиси Энцо Фернандес ҳамон клубнинг устувор трансфер мақсадларидан бири бўлиб қолмоқда. Бироқ Лондон клуби аргентиналик футболчини 120 миллион фунт стерлингга баҳолаётгани «шаҳарликлар» учун ҳаддан ташқари юқори нарх сифатида кўрилмоқда.

«Борнмут» ярим ҳимоячиси Алекс Скотт ҳамда «Кристал Пэлас» футболчиси Адам Уортонни қўлга киритиш имкони бўлмаган. «Рома» аъзоси Ману Коне эса ҳамон реал вариант сифатида кўрилмоқда. Бироқ трансфер ойнаси ёпилишига оз вақт қолгани сабаб «Манчестер Сити» француз футболчиси учун одатдагидан юқорироқ нарх тўлашига тўғри келиши мумкин.

Айни пайтда Жек Грилишнинг «Эвертон»га қайтиши масаласи ҳам очиқ қолмоқда. Икки клуб трансфер формати бўйича ҳали келишувга эриша олмаган. «Манчестер Сити» футболчини тўлиқ сотиб юборишни истамоқда, «Эвертон» эса ўтган мавсумдаги 12 миллион фунт стерлинглик ижара келишувидан арзонроқ вариантни талаб қилмоқда.

Манбаларнинг таъкидлашича, «Манчестер Сити» трансфер ойнаси ёпилгунига қадар таркибни тарк этган футболчилар ўрнини тўлдиришга «қатъий бел боғлаган».