"Real" yarim himoyachisi Federiko Valverde "qaymoqranglilar"ning sobiq bosh murabbiyi Zinedin Zidan haqida o‘z fikrlari bilan o‘rtoqlashdi.

"Zidan — futbol afsonasi. U menga juda ko‘p yordam bergan. Futbolchi ma’lum bir qiyinchiliklarga duch kelganida, ularni yengib o‘tishi qiyin bo‘lgan lahzalar bo‘ladi. Zidan esa doimo vazminlik va xotirjamlik timsoli edi. U o‘ziga bo‘lgan ishonchni menga ham yuqtira olgan. Kundalik hayotda Zidan doim oilam va farzandlarimning ahvoli bilan qiziqib turardi. Bu meni juda xursand qilardi", — deya Valverdening so‘zlarini keltiradi Madrid Extra.

Eslatib o‘tamiz, Zinedin Zidan "Real"ni 2016–2018 va 2019–2021 yillarda boshqargan. Uning qo‘l ostida Madrid klubi 11 ta sovrinni, jumladan, ketma-ket uchta Chempionlar Ligasi kubogini qo‘lga kiritgan.