«PSJ» bosh murabbiyi Luis Enrike Fransiya terma jamoasi ixtiyoridan qaytgan himoyachi Lukas Ernandesning professional ish tutishi va ruhiy holatiga yuqori baho berdi.
Ispaniyalik mutaxassis tajribali himoyachining jamoadagi o‘rni naqadar muhimligini alohida ta’kidlab o‘tdi:
«Uni terma jamoada ko‘rish yoqimli, Lukas juda yaxshi o‘yin ko‘rsatdi. Futbolda shunday holatlar bo‘ladiki, siz maydonga tushmasdan turib ham jamoa uchun muhim insonga aylanasiz. Bunday fazilatga ega bo‘lish juda qiyin. Bizda doimo jangovar holatda turadigan futbolchilar ko‘p, masalan, Lukas Beraldo, Lukas Ernandes, Gonsalu Ramush yoki Kan In Li kabi».
Ma’lumot uchun, 30 yoshli Ernandes joriy mavsumda parijliklarning asosiy tarkibida muqim joyga ega emas. U hozirgacha 25 ta o‘yinda ishtirok etdi. Biroq klubdagi kam o‘yin amaliyotiga qaramay, u Fransiya terma jamoasining chap qanot himoyasi uchun hamon asosiy va eng ishonchli variant bo‘lib qolmoqda.
