«ПСЖ» бош мураббийи Луис Энрике Франция терма жамоаси ихтиёридан қайтган ҳимоячи Лукас Эрнандеснинг профессионал иш тутиши ва руҳий ҳолатига юқори баҳо берди.

Испаниялик мутахассис тажрибали ҳимоячининг жамоадаги ўрни нақадар муҳимлигини алоҳида таъкидлаб ўтди:

«Уни терма жамоада кўриш ёқимли, Лукас жуда яхши ўйин кўрсатди. Футболда шундай ҳолатлар бўладики, сиз майдонга тушмасдан туриб ҳам жамоа учун муҳим инсонга айланасиз. Бундай фазилатга эга бўлиш жуда қийин. Бизда доимо жанговар ҳолатда турадиган футболчилар кўп, масалан, Лукас Беральдо, Лукас Эрнандес, Гонсалу Рамуш ёки Кан Ин Ли каби».

Маълумот учун, 30 ёшли Эрнандес жорий мавсумда парижликларнинг асосий таркибида муқим жойга эга эмас. У ҳозиргача 25 та ўйинда иштирок этди. Бироқ клубдаги кам ўйин амалиётига қарамай, у Франция терма жамоасининг чап қанот ҳимояси учун ҳамон асосий ва энг ишончли вариант бўлиб қолмоқда.