Mersisaydning «Liverpul» klubi himoyachi Ibraima Konate atrofidagi mish-mishlarga nuqta qo‘ydi. Klub rahbariyatining ta’kidlashicha, yanvar oyida futbolchi bo‘yicha hech qanday rasmiy taklif kelib tushmagan va himoyachining o‘zi ham jamoani tark etish istagini bildirmagan.
Shunga qaramay, Konate yozgi transfer oynasi oldidan Yevropa klublari bilan muzokara o‘tkazish huquqiga ega. Biroq hozircha uning oldidagi variantlar ancha cheklangan ko‘rinmoqda:
-
«Real»: Madridliklar futbolchiga bo‘lgan qiziqishini Rojdestvo bayrami oldidan to‘xtatishgan va hozirgacha bu istak qayta uyg‘ongani yo‘q.
-
«Bavariya»: Myunxenliklarning himoyani kuchaytirishga bo‘lgan ehtiyoji kamaydi. Bunga Dayo Upamekanoning klub bilan 2030 yilgacha mo‘ljallangan yangi shartnoma imzolagani sabab bo‘ldi.
-
«PSJ»: Parij klubi bilan bog‘liq xabarlar haligacha aniq taklif darajasiga chiqqani yo‘q.
Konatening yakuniy qaroriga sport omillari ham ta’sir qilishi mumkin. Xususan, «Liverpul»ning keyingi mavsum uchun Chempionlar Ligasi yo‘llanmasini qo‘lga kiritishi futbolchining kelajakdagi rejalarida muhim rol o‘ynaydi. Yaqin haftalar ichida bu boradagi vaziyatga to‘liq oydinlik kiritilishi kutilmoqda.
