«Shtutgart» yarim himoyachisi Chema Andres futbolda hatto akademiya darajasida ham Madridning «Real» klubida o‘ynash eng qiyini ekanini aytdi.

"Real"da o‘ynash — futboldagi eng murakkab ish. Ushbu voqelik hamma narsani belgilab beradi: eng zo‘r futbolchilar aynan shu yerga kelishni xohlashadi. Akademiya uchun bu daraja yanada yuqoriroq ko‘tarilgan va bu yerdagi sharoitlar moliyaviy bosim hamda tarkib dinamikasi sababli «Barselona»nikidan tubdan farq qiladi", — deya Andresning so‘zlarini keltirmoqda NY Times.

20 yoshli ispaniyalik futbolchi o‘tgan yozda «Real» akademiyasidan Germaniya klubiga ko‘chib o‘tgan edi. U «Kastilya» (madridliklarning ikkinchi jamoasi) safida 35 ta o‘yin o‘tkazib, 3 ta golli uzatmani amalga oshirgan.

Joriy mavsumda Andres barcha turnirlarda 32 ta o‘yinda maydonga tushib, 2 ta gol urdi va 2 ta golli uzatma muallifiga aylandi.