«Arsenal» ushbu mavsumda «trebl» qayd eta olmaydigan bo‘ldi.
Bugun Mikel Arteta shogirdlari Angliya Kubogi chorak finalida «Sautgempton»ga 1:2 hisobida imkoniyatni boy berib, musobaqani tark etishdi. Shu tariqa, endilikda jamoa bir mavsumda ikkitadan ortiq sovrinni qo‘lga kirita olmaydi.
Ta’kidlash joizki, «to‘pchilar»ning bundan oldingi o‘yini Angliya Liga Kubogi finali edi — unda londonliklar «Manchester Siti»ga (0:2) mag‘lub bo‘lishgandi.
Premyer-liga turnir jadvalida «Arsenal» 31 ta o‘yindan so‘ng 70 ochko jamg‘arib, birinchi o‘rinni egallab turibdi. Ular bitta kam o‘yin o‘tkazgan «Manchester Siti»dan 9 ochkoga oldinda bormoqda.
Chempionlar Ligasi chorak finalida London klubi «Sporting» bilan to‘qnash keladi. Ushbu jamoalar o‘rtasidagi dastlabki uchrashuv 7 aprel kuni bo‘lib o‘tadi.
