«Barselona» bosh murabbiyi Xans-Diter Flik Madridning «Atletiko» klubiga qarshi kechgan bahsda Markus Reshford tomonidan kiritilgan golga munosabat bildirdi.

28 yoshli vinger uchrashuvning 42-daqiqasida hisobni tenglashtirdi. Bahs yakunida esa ingliz futbolchisining o‘rniga maydonga tushgan Robert Levandovski «ko‘k-anorranglilar»ga g‘alaba keltirgan golni urdi — 2:1.

«Men Reshfordning o‘yinidan juda mamnunman. Bugun u o‘z mahoratini ko‘rsatdi va juda muhim golni urdi. Uning kelajagiga to‘xtaladigan bo‘lsam, hozircha bir nima deya olmayman — mavsum yakuniga qadar bor e’tiborimizni o‘yinlarga qaratishimiz kerak», — deya Flikning so‘zlarini keltirmoqda Barca Universal.

Markus Reshford 31 yanvardan beri ilk bor gol urishga muvaffaq bo‘ldi. Shuningdek, «Manchester Yunayted»dan ijaraga olingan futbolchining ushbu goli «Barselona» uchun nemis mutaxassisi qo‘l ostidagi 300-gol sifatida tarixga kirdi.