«Барселона» бош мураббийи Ханс-Дитер Флик Мадриднинг «Атлетико» клубига қарши кечган баҳсда Маркус Рэшфорд томонидан киритилган голга муносабат билдирди.

28 ёшли вингер учрашувнинг 42-дақиқасида ҳисобни тенглаштирди. Баҳс якунида эса инглиз футболчисининг ўрнига майдонга тушган Роберт Левандовски «кўк-анорранглилар»га ғалаба келтирган голни урди — 2:1.

«Мен Рэшфорднинг ўйинидан жуда мамнунман. Бугун у ўз маҳоратини кўрсатди ва жуда муҳим голни урди. Унинг келажагига тўхталадиган бўлсам, ҳозирча бир нима дея олмайман — мавсум якунига қадар бор эътиборимизни ўйинларга қаратишимиз керак», — дея Фликнинг сўзларини келтирмоқда Barca Universal.

Маркус Рэшфорд 31 январдан бери илк бор гол уришга муваффақ бўлди. Шунингдек, «Манчестер Юнайтед»дан ижарага олинган футболчининг ушбу голи «Барселона» учун немис мутахассиси қўл остидаги 300-гол сифатида тарихга кирди.