«Barselona» bosh murabbiyi Xans-Diter Flik La Liga doirasida Madridning «Atletiko» klubi ustidan qozonilgan g‘alabadan (2:1) keyingi taassurotlari bilan o‘rtoqlashdi.

Kataloniyaliklar Madriddagi bahsda 87-daqiqada Robert Levandovski tomonidan kiritilgan gol evaziga g‘alabani ilib ketishdi. Eslatib o‘tamiz, «matraschilar» Nikolas Gonsalesning chetlatilishi sababli butun ikkinchi bo‘limni bir kishi kam bo‘lib o‘tkazishdi.

«Chetlatishdan so‘ng biz o‘yinni nazorat qildik va g‘alabaga loyiq edik. Jamoamiz ikkinchi golni urish uchun bor imkoniyatini ishga soldi. Bu oson bo‘lgani yo‘q. Muhit juda tarang, his-hayajonlar esa avjida edi. Qiyin uchrashuv, lekin uch ochkoni qo‘lga kiritganimizdan xursandman. Hozirda biz yaxshi holatdamiz — mavsum yakunlanishiga sakkiz tur qolganda yetti ochkolik farq bilan oldinda boryapmiz», — dedi Flik o‘z intervyusida.

«Barselona» 76 ochko bilan turnir jadvalida peshqadamlik qilmoqda, Madridning «Real» klubi esa 69 ochko bilan ikkinchi o‘rinda. «Atletiko» (57 ochko) to‘rtinchi pog‘onada bormoqda va «Vilyarreal»dan (58 ochko) ortda qolmoqda.