«Барселона» бош мураббийи Ханс-Дитер Флик Ла Лига доирасида Мадриднинг «Атлетико» клуби устидан қозонилган ғалабадан (2:1) кейинги таассуротлари билан ўртоқлашди.

Каталонияликлар Мадриддаги баҳсда 87-дақиқада Роберт Левандовски томонидан киритилган гол эвазига ғалабани илиб кетишди. Эслатиб ўтамиз, «матрасчилар» Николас Гонсалеснинг четлатилиши сабабли бутун иккинчи бўлимни бир киши кам бўлиб ўтказишди.

«Четлатишдан сўнг биз ўйинни назорат қилдик ва ғалабага лойиқ эдик. Жамоамиз иккинчи голни уриш учун бор имкониятини ишга солди. Бу осон бўлгани йўқ. Муҳит жуда таранг, ҳис-ҳаяжонлар эса авжида эди. Қийин учрашув, лекин уч очкони қўлга киритганимиздан хурсандман. Ҳозирда биз яхши ҳолатдамиз — мавсум якунланишига саккиз тур қолганда етти очколик фарқ билан олдинда боряпмиз», — деди Флик ўз интервьюсида.

«Барселона» 76 очко билан турнир жадвалида пешқадамлик қилмоқда, Мадриднинг «Реал» клуби эса 69 очко билан иккинчи ўринда. «Атлетико» (57 очко) тўртинчи поғонада бормоқда ва «Вильярреал»дан (58 очко) ортда қолмоқда.