«Sautgempton» bosh murabbiyi Tonda Ekkert Angliya Kubogi chorak finalida Londonning «Arsenal» jamoasi ustidan qozonilgan kutilmagan g‘alabadan (2:1) so‘ng o‘z fikrlarini bildirdi.

«Avliyolar» Shey Charlzning 85-daqiqada kiritgan goli evaziga Premyer-liganing amaldagi peshqadamini mag‘lub etishdi.

«Bu o‘ziga xos oqshom. Bizni nima kutayotganini bilardik, ammo ayrim vaziyatlarda to‘pga egalik qilishni uddaladik. Bunday raqibga qarshi bahsda bu juda qadrli. O‘ylaymanki, to‘liq 90 daqiqalik harakatlarimizdan kelib chiqib, g‘alabaga loyiq edik.

Har bir o‘yin — alohida tarix: ba’zida to‘pga 70% egalik qilib g‘alaba yo‘lini topish kerak, ba’zida esa tezkor o‘tishlar va standart vaziyatlarga urg‘u berish to‘g‘ri bo‘ladi. Biz turli uslublarda g‘alaba qozona olishimizni isbotladik», — deya 33 yoshli mutaxassis so‘zlaridan iqtibos keltiradi BBC.

«Sautgempton» ayni damda Chempionship turnir jadvalida yettinchi o‘rinni egallab turibdi.